Ráðgeving

Ráðgevi: Ragnhild Dahl 

Er at hitta á skrivstovuni týsdagar og mikudagar kl. 10-14

Telefon 72 48 27
Teldupostur ragnhild@javni.fo

Sambært § 2 í almannalógini, hevur Almannaverkið skyldu at veita sosialfakliga ráðgeving. Hetta merkir, at borgarar kunnu fáa vegleiðing um, hvør hjálp kann veitast sambært galdandi lógum, bæði innan hesa løgtingslóg og aðra almannalóggávu. Ráðgevingin skal verða skipað soleiðis, at persónurin í størst møguligan mun gerst sjálvbjargin og fær førleikar at handfara sínar fíggjarligu og sosialu avbjóðingar – bæði nú og í framtíðini. Hetta kann til dømis snúgva seg um møguleikar fyri arbeiði, útbúgving ella at laga útreiðslur eftir fíggjarligu støðuni.

Ráðgevingarskyldan fevnir eisini um at kunna um, hvørjar tænastur eru tøkar, og hvussu tænastustøðið er. Eisini skal Almannaverkið vísa á møguleikar fyri hjálp hjá øðrum myndugleikum ella sjálvsognarstovnum. Henda ráðgevingin er ikki bert til tann einstaka, men eisini til avvarðandi, sum ofta hava ein týðandi leiklut.

Í serligum førum, til dømis tá talan er um barn við breki ella varandi sjúku, skal Almannaverkið veita skjóta og greiða vegleiðing um stuðulsmøguleikar til bæði barnið og familjuna. Harumframt fevnir skyldan eisini um uppleitandi arbeiði til fólk við víðfevndum sosialum trupulleikum.

Hóast Almannaverkið hevur hesa lógarbundnu skyldu, veitir Javni eina eyka vegleiðing til tey, ið hava tørv á tí. Henda tænastan er tó treytað av, at viðkomandi er limur í Javna.

Almannalógin §2:

§ 2. Almannaverkið skal veita persóni sosialfakliga ráðgeving um, hvør hjálp kann veitast sambært hesi løgtingslóg og í mun til aðra almannalóggávu.

Stk. 2. Ráðgevingin skal veitast, so at persónur í størst møguligan mun gerst sjálvbjargin og sjálvur kann loysa verandi og framtíðar fíggjarligar avbjóðingar, undir hesum møguleikar fyri arbeiði ella útbúgving, ella at minka um fastar útreiðslur, ið fíggjarligt rúm ikki er fyri.

Stk. 3. Ráðgevingin skal eisini fevna um, hvør tænasta kann veitast sambært hesi løgtingslóg og í mun til tænastustøði, eins og Almannaverkið skal vísa á møguleikar fyri hjálp hjá øðrum myndugleikum og sjálvsognarstovnum. Ráðgevingarskyldan fevnir um ráðgeving til persónin sjálvan og til avvarðandi.

Stk. 4. Er talan um barn, ið hevur fingið brek ella varandi sjúku, skal Almannaverkið veita skjóta ráðgeving um, hvør hjálp kann veitast barninum og familjuni.

Stk. 5. Ráðgevingarskyldan hjá Almannaverkinum fevnir somuleiðis um uppleitandi arbeiði til persónar við víðfevndum sosialum trupulleikum.